حديث الدائرة - مكالمات انتخابية

مكالمات إنتخابية سريعة

ر: ألو..السلام عليكم
ن: وعليكم السلام

ر: معاك لجنة المرشح دليهي الهاجري
ن: يا هلا.. تفضل؟

ر: بس ودنا نبلغكم ان مرشحنا دليهي الهاجري ما يقصر و هو حاضر باللي تامرون فيه :)
ن: ما قصر.. الله يوفقه

ر: وترا حاضرين جان محتاجين خدمة او اي شي !؟
ن: لاشكراً

ر: اذا بخاطركم معاملة او علاج بالخارج او حتى دعم عمالة..ترا ما يقصر دليهي يساعد الناس:)
ن: صج!!! والله فيه الخير..بس شلون دعم العمالة! انا طالب!؟ :

ر: ايي عادي انت بس حياك المقر وانتفاهم على الباجي:) لا و ينزلك قبل الانتخابات بعد!
ن: شلووون! عادي عطوني بدون لا اييكم!

ر: لا ما يصير لازم تعطينا ضمان..حياك المقر و نكمل الموضوع:)
ن: انزين واذا انا ابي تخدموني لله بس ما ابي اصوت حق مرشحكم! شلون!

ر: لا ما يصير الحين دليهي بيخدمك فلازم تصوت له!
ن: واذا انا مو مقتنع فيه و ابيه يخدمني لله!! شلون يعني

ر: ما يصير! حياك المقر و انتفاهم! :
ن: يعني تقدم لي رشوة علشان اصوت حق مرشحكم؟

ر: لا يبا شهالحجي! مجرد خدمه و مساعده!
ن: يعني مرشحكم بينجح على حساب دعم العمالة و فلوس الدولة؟!!

ر: شهالكلام!!! دليهي يقدم خدمة مو رشوه!
ن: تقولي دعم عمالة و اصوت له! كل هذا مو رشوه!! الا رشوه و قلة حيا!

ر: عيب هالكلام!
ن: اياني واياكم تتصلون على بيوت الناس بدون لا حيا و لا مستحى!! شراء الاصوات شلون قايل بعد!!

ر: احترم نفسك! ترا نوصل اسمك لدليهي و هو يرفع عليك قضية و يعرف شلون يتعامل معاك!!!
ن: فوق شينك قوات عينك!! ماني سامع كلمة زايدة منك يا قليل الحيا و الادب! مابي اسمع صوتك مرة ثانية! و ان سمعتني اياه ما يحصل خير!. (انهاء المكالمة).

===============

م: السلام عليكم.. فلان؟
ف: عليكم السلام..نعم تفضل؟

م: معاك مدير حملة المرشح هشام البغلي
ف: ياهلا..تفضل؟

م: الصراحة سمعنا عنك كل خير و ودنا نستفيد من خدماتك و ودنا تشتغل معانا بالحملة
ف: شكرا. انا ملتزم بحملة و ما اتوقع اني اقدر اساعدكم

م: مع منو تشتغل؟
ف: يهمك تعرف؟

م: ايي والله؟
ف: مع العم احمد السعدون

م: والنعم.. بس الريال ناجح.. و مرشحنا بحاجتك وما يحتاج بعد انت من الجماعة!!! (في اشارة للمذهب!)
ف: اسمحلي مرتبط و ما اقدر.

م: ... بس ترا احنا عندنا الشغل بمقابل!
ف: الظاهر انك ما تفهم و لا تستحي. ماله داعي هالكلام! و ارجو انك تفهم شغله وحده! اذا سمعت ان واحد من الناس بيتكلم عن سالفتك هذي! فلازم تعرف انها من فلان الفلاني!(الشخص المتحدث) أنا اللي راح اقول للناس عنك و عن سالفتك. (انتهت المكالمة).

تم التصرف بصيغة المحادثة حفاظاً على هوية الاشخاص الذين تم الاتصال بهم.